Home / میموریل لیکچر / غالب انسٹی ٹیوٹ میں بیگم عابدہ احمد میموریل لکچر

غالب انسٹی ٹیوٹ میں بیگم عابدہ احمد میموریل لکچر

فروری 2017

غالب انسٹی ٹیوٹ کی اہم ثقافتی تنظیم ’’ہم سب ڈرامہ گروپ‘‘ کی طرف سے ملک کی سابق خاتونِ اوّل بیگم عابدہ احمد کی یادمیں ۲ مارچ شام ساڑھے پانچ بجے ایوانِ غالب میں ایک لکچرکا اہتمام کیا جارہاہے جس میں نامور ڈرامہ نگار،ہدایت کار اور سماجی کارکن ایم۔کے رینا ’’فنکاراور بدلتا سماج‘‘ کے عنوان سے خطبہ پیش کریں گے۔ اس جلسے کی صدارت دلّی ہائی کورٹ کے جج جسٹس بدر دُرریز احمد فرمائیں گے۔ ڈاکٹر رخشندہ جلیل چیئرپرسن ،ہم سب ڈرامہ گروپ، مہمان مقرر کا تعارف کرائیں گی۔ ہم سب ڈرامہ گروپ غالب انسٹی ٹیوٹ کی اہم ثقافتی تنظیم ہے۔ اس تنظیم کی بنیاد مرحومہ بیگم عابدہ احمد نے رکھی تھی۔ ہم سب ڈرامہ گروپ کی طرف سے دلّی و بیرونِ دلّی میں ۵۰سے زیادہ ڈرامے اسٹیج کیے جاچکے ہیں۔ ۱۹۷۰ء کے قریب جب دلّی میں ثقافتی سرگرمیاں بہت محدود تھیں ایسے ماحول میں ہم سب ڈرامہ گروپ نے اہم تاریخی ڈرامے پیش کیے جنہیں دیکھنے کے لیے اُس وقت کی تمام عظیم ہستیاں آتی تھیں۔ فن کار سماج کے ہر پہلو کواپنی اداکاری کے ذریعے اسٹیج پر پیش کرتاہے۔ فن کار کا سماج سے اور سماج کا فن کارسے ایسا رشتہ ہے جس کی حقیقت کو ہردورمیں تسلیم کیا گیا ہے۔ایم۔کے۔ رینا ایک ایسے اسکالرہیں جنہوں نے اپنی تحریروں سے اپنے افکاراوراپنے فن سے طویل عرصے سے سماج کے ہر طبقے کواپنے قریب کرنے کی کوشش کر رہے ہیں۔ لہٰذا امید کی جارہی ہے کہ وہ اس موضوع پر کچھ ایسے نکات بھی پیش کریں گے جس کی موجودہ وقت میں ضرورت ہے۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے